სამოქალაქო განათლების ოლიმპიადა ტარდება IX-XII კლასების მოსწავლეებისათვის. 

ცხადია, ოლიმპიადაში მონაწილეობა შეუძლიათ არაქართულენოვანი სკოლების მოსწავლეებს - ტესტირება ჩატარდება ქართულ, რუსულ, სომხურ და აზერბაიჯანულ ენებზე.

მოსწავლემ რეგისტრაციის გასავლელად უნდა მიმართოს სკოლის ადმინისტრაციას, სკოლის წარმომადგენელი სპეციალური სისტემის მეშვეობით დაარეგისტრირებს მოსწავლეს ოლიმპიადისათვის.

ოლიმპიადის პირველი ტური ტარდება კომპიუტერულად, საქართველოს ყველა რაიონისა და თბილისის სკოლებში.

გამოყენებული იქნება არჩევითპასუხებიანი ტესტი, რომელიც  დაეფუძნება სამოქალაქო განათლების სასწავლო გეგმას. ტესტში შევა დავალებები, რომლებიც ძირითადად აფასებს სამოქალაქო განათლებაში ნასწავლი ცნებებისა და კონცეფციების ცოდნასა და ცოდნის გამოყენების უნარს (როგორ იყენებენ მოსწავლეები სამოქალაქო (Civics) და მოქალაქეობრივი უფლებების (Citizenship) კონცეფციებს სხვადასხვა კონტექსტში). მოსწავლე ტესტის დასრულებისთანავე გაიგებს თავის შედეგს.

მეორე და მესამე ტურში ძირითადი აქცენტი გაკეთდება კრიტიკული აზროვნების, არგუმენტირებული მსჯელობის, შემოქმედებითობის, ე. წ. დილემური სიტუაციების ზნეობრივი და სამართლებრივი პოზიციებიდან განსჯისა და პრობლემის გადაწყვეტის უნარზე. შეფასდება, თუ როგორ იყენებენ მოსწავლეები სამოქალაქო და მოქალაქეობრივი უფლებების კონცეფციებს პრობლემის გადაწყვეტის პროცესში. მეორე ტურში ტესტში ძირითადად   ღია დავალებები იქნება.

ნაშრომები შეფასდება გამსწორებლების მიერ ელექტრონულად.

მესამე ტურში გათვალისწინებულია ორი ნაწილი: 

1. ესე - წერითი დავალება, რომელიც მოსწავლისაგან მოითხოვს რამდენიმე დილემური სიტუაციის ზნეობრივი და სამართლებრივი პოზიციებიდან განსჯას და/ან პრობლემის გადაწყვეტის უნარის დემონსტრირებას. შეფასდება სამოქალაქო ღირებულებების პატივისცემის წარმოჩენა, სამოქალაქო და მოქალაქეობრივი უფლებების კონცეფციების გამოყენება პრობლემის გადაწყვეტის პროცესში, კრიტიკული აზროვნების, არგუმენტირებული მსჯელობის უნარი და პრობლემისადმი შემოქმედებითი მიდგომა.
2. პრეზენტაცია - საპრეზენტაციო თემა იმგვარად იქნება შერჩეული, რომ გამოვლინდეს, თუ რამდენად აცნობიერებს მოსწავლე მოქალაქის უფლებებს და პასუხისმგებლობებს, დემოკრატიულ ღირებულებებს. შეფასდება ზეპირი მეტყველება, არგუმენტირებული

მსჯელობა, სამოქალაქო ღირებულებების პატივისცემა და პრობლემისადმი შემოქმედებითი მიდგომა; აგრეთვე, დასმულ კითხვებზე არგუმენტირებული პასუხები.

სამოქალაქო განათლების ოლიმპიადის მესამე ტური ორი ეტაპად გაიმართება:
 

I ეტაპი - არგუმენტირებული ესე

პირველ ეტაპზე მოსწავლეებს დაევალებათ არგუმენტირებული ესეს დაწერა. ესეს საშუალებით შეფასდება მოსწავლეთა მიერ პრობლემის გადაწყვეტის, სამოქალაქო კონცეფციების გამოყენების, კრიტიკული აზროვნების, არგუმენტირებული მსჯელობის უნარი. აგრეთვე, ზოგადი ერუდიცია, სამოქალაქო ღირებულებების პატივისცემა და პრობლემისადმი შემოქმედებითი მიდგომა. ესე უნდა მოიცავდეს პრობლემის, სიტუაციის ანალიზსა და შეფასებას, გარკვეული პროცესების განვითარების არგუმენტირებულ პროგნოზირებას, პრობლემის მოგვარების ინდივიდუალურ დასაბუთებულ ხედვას, საკუთარი მოსაზრებებსა და დასკვნებს.

სასურველია  ესე შედგებოდეს   400-500 სიტყვისაგან,  200 სიტყვაზე ნაკლები მოცულობის ესე არ შეფასდება. თემის დასაწერად მოსწავლეებს მიეცემათ 3 საათი. მესამე ტურის პირველი ეტაპის შედეგების მიხედვით შეირჩევა 40 საუკეთესო ესეს ავტორი.

 

II ეტაპი - პრეზენტაცია

პირველ ეტაპის შედეგად გამოვლენილი 40 საუკეთესო მოსწავლე წარსდგება სპეციალური კომისიის წინაშე, სადაც წარადგენს მის მიერ დაწერილ ესეს. პრეზენტაციისას შეფასდება მოსწავლეთა ზეპირი მეტყველება, პრეზენტირების უნარი, არგუმენტირებული მსჯელობა, სამოქალაქო ღირებულებების პატივისცემა და დასმულ კითხვებზე სხარტი და არგუმენტირებული პასუხი. თითო მოსწავლის პრეზენტაცია გაგრძელდება 10-15 წუთი.

კომისიის წევრები შეაფასებენ მოსწავლეთა პრეზენტაციებს და შეარჩევენ 20 საუკეთესო პრეზენტატორს. სწორედ ეს 20 მოსწავლე იქნება სამოქალაქო განათლების ოლიმპიადის გამარჯვებული.

მოსწავლეთა მიერ დაწერილი საუკეთესო ესეები გამოიცემა კრებულის სახით. 

ოლიმპიადის პირველი ტური კომპიუტერულად ტარდება, მოსწავლე შედეგს ტესტირების დასრულებისთანავე, ეკრანზე დაინახავს. პირველ ტურში გამოყენებული იქნება მხოლოდ არჩევითპასუხებიანი დავალებები.

მეორე და მესამე ტურის (ესეს ნაწილი) ნაშრომებს კი გამსწორებლები ელექტრონულად შეაფასებენ. 

მეორე ტურში მონაწილეობას მიიღებენ მოსწავლეები, რომლებიც მოხვდებიან რეიტინგული სიის პირველ 2000-ში.

ესამე ტურში მონაწილეობას მიიღებენ მოსწავლეები, რომლებიც მოხვდებიან რეიტინგული სიის პირველ 200-ში.

მესამე ტურის ბოლოს გამოვლინდებიან ეროვნულ ოლიმპიადაში გამარჯვებულები. 

ოლიმპიადის პირველი ტური ტარდება ყველა მონაწილე სკოლაში. მეორე ტური ჩატარდება რეგიონულ ცენტრებში (რეგიონში შეირჩევა ერთი კონკრეტული სკოლა). მესამე ტური ჩატარდება თბილისში.

ვებგვერდებზე www.mokalake.ge online.naec.ge;  www.naec.ge 

სპეციალურ საძიებო სისტემაში შესაბამისი მონაცემების (პირადი ნომერი, ელექტრონული ფოსტა) მითითების შემდეგ მონაწილე იხილავს შედეგს. გამოქვეყნდება მომდევნო ტურში გადასულების სიაც.

მოსწავლე საძიებო სისტემაში შესვლის შემდეგ (www.mokalake.ge online.naec.ge;  www.naec.ge) იხილავს პირველი ტურის დავალებებს, არჩევით პასუხებს, სწორ პასუხებსა და მის მიერ მონიშნულ პასუხებს.  მეორე და მესამე ტურის დავალებები, ასევე მონაწილეთა ნაშრომების ელექტრონული ასლები და შეფასებები განთავსდება ამავე ვებგვერდებზე.

იმის გათვალისწინებით, რომ პირველ ტურში მხოლოდ არჩევითპასუხებიანი დავალებები იქნება, მოსწავლეს მხოლოდ ტექნიკური აპელაციის (თუ მოსწავლე მიიჩნევს, რომ  ტესტირებისას მის მიმართ ან ზოგადად დაირღვა დადგენილი პროცედურა) შესაძლებლობა ექნება.

მეორე და მესამე ტურში მონაწილეს შესაძლებლობა ექნება გაასაჩივროს შედეგი. სააპელაციო განაცხადი ივსება ელექტრონულად. აპელაციის შედეგებიც გამოქვეყნდება ანალოგიური სქემით - მოსწავლე საძიებო სისტემის მეშვეობით შეიტყობს აპელაციის შედეგს.

მესამე ტურის შემდეგ გამოვლინდება 20 გამარჯვებული. ოლიმპიადის გამარჯვებულებს ორგანიზაცია „მოქალაქე" დააჯილდოვებს. გათვალისწინებულია გამარჯვებულთა გაგზავნა ენის შემსწავლელ კურსებზე (ინგლისური, გერმანული, ფრანგული) დასავლეთ ევროპის ქვეყნებში. 

მომზადდა ვიდეო ლექციების ციკლი სამოქალაქო განათლების საკითხებზე. ვიდეოლექციების მიზნობრივად შერჩეული, საინტერესო  თემები მოსწავლის სამოქალაქო ცნობიერებისა და ღირებულებების სისტემის ფორმირების მხარდაჭერაზეა ორიენტირებული: საინტერესოდ მოთხრობილი ისტორიები ხელს შეუწყობს მოსწავლეებს თავიანთი უფლება-მოვალეობებისა და სამოქალაქო პასუხისმგებლობების გაცნობიერებაში,  ასევე, მრავალფეროვნების პატივისცემის, გარემოსდაცვითი ცნობიერებისა და დემოკრატიული ღირებულებების ჩამოყალიბებაში. ვიდეოლექციების მიზანია სამოქალაქო განათლების საკითხებზე, სამოქალაქო ღირებულებებზე მოსწავლეებისათვის დამატებითი ინფორმაციის მიწოდება.

მომზადდა ვიდეოლექციები შემდეგ თემებზე:

,,სამაგალითო ადამიანები" -  ლექციების ეს ციკლი მიზნად ისახავს ახალგაზრდებს გააცნოს საზოგადოებისათვის ნაკლებად ცნობილი ადამიანების ისტორიები, რომელთა ცხოვრებაც  სხვადასხვა ეპოქაში მოქალაქეობრივი ცნობიერებისა და ღირებულებების უპირობო დაცვის, თავგანწირვის მაგალითებს წარმოადგენს.

-  „სამოქალაქო ცნობიერება და დემოკრატიული ღირებულებები ქართულ ლიტერატურაში".

-  „საქართველოს ისტორია - ტოლერანტობა და მრავალფეროვნების პატივისცემა".

-  „შეზღუდული შესაძლებლობის მქონე ადამიანები - სტიგმა და ტოლერანტობა".

და სხვა.

დეტალური ინფორმაციის მისაღებად დაგვირეკეთ 2473333 ან მოგვწერეთ ოლიმპიადის Facebook გვერდზე  https://www.facebook.com/CivilEducationOlympiad

სამოქალაქო განათლების ოლიმპიადის პირველი ტური კომპიუტერულად ჩატარდა, მეორე ტურის მონაწილეები კი ტესტის რვეულში და პასუხების ფურცლებზე იმუშავებენ. ტესტი 55 ქულიანია და 22 დავალებისგან შედგება: 15 დავალება დახურულბოლოიანია, ხოლო 7 - ღიაბოლოიანი. ტესტით შეფასდება კრიტიკული აზროვნების, არგუმენტირებული მსჯელობის, შემოქმედებითობის, ე. წ. დილემური სიტუაციების ზნეობრივი პოზიციებიდან განსჯისა და პრობლემის გადაწყვეტის უნარი. ასევე შემოწმდება, თუ როგორ იყენებენ მოსწავლეები სამოქალაქო და მოქალაქეობრივი უფლებების კონცეფციებს პრობლემის გადაწყვეტის პროცესში.

მხოლოდ მეორე ტურის შედეგების საფუძველზე გამოვლინდებიან ოლიმპიადის ის მონაწილეები, რომლებიც მონაწილეობას მიიღებენ ოლიმპიადის მესამე ტურში.

გაითვალისწინეთ, რომ ნაშრომი არ გასწორდება, თუ:

• დაზიანებულია;

• მოსწავლე პასუხების ფურცელს დააწერს სახელს, გვარს ან პიროვნების იდენტიფიცირების შესაძლებლობის შემცველ რაიმე სხვა ინფორმაციას, მაგ: მეტსახელს ან რაიმე სახის ისეთ გრაფიკულ გამოსახულებას, რომელიც დაკავშირებული არ არის ტესტურ დავალებასთან.

გახსოვდეთ, არ შეიძლება:

• პასუხების ფურცლის გაკეცვა, შტრიხკოდის გაფერადება, დაზიანება და ა.შ.

• დროზე ადრე ტესტზე მუშაობის დაწყება;

• გამოცდის მიმდინარეობისას მოსწავლეების ერთმანეთთან გადალაპარაკება;

• ერთმანეთის დახმარების მცდელობა ან სხვა პირისაგან დახმარების მიღება;

• ჩამოთვლილი წესების დარღვევისას მოსწავლე მიიღებს გაფრთხილებას;

• ერთი გაფრთხილების შემდეგ, ან წესების უხეში დარღვევის გამო (მეთვალყურის შეურაცხყოფა და სხვ.) აპლიკანტი დაუყოვნებლივ მოიხსნება გამოცდიდან.

ფაილების ჩაწერის ვიდეო ინსტრუქცია შეგიძლიათ იხილოთ შემდეგ ბმულზე