პროექტის მიზანია:

• ახალგაზრდების ჩართვა სამოქალაქო საზოგადოების განვითარების პროცესში, ადგილობრივი დემოკრატიის გაძლიერება, თვითმმართველობის იდეის პოპულარიზაცია ახალგაზრდებში.
• საზოგადოებრივ პროცესებში სტუდენტების თანამონაწილეობის მნიშვნელობის გაზრდა და მოქალაქეობრივი მოვალეობებისა თუ როლის გაცნობიერების ხელშეწყობა.
• თვითმმართველობის საკითხებში ახალგაზრდა პროფესიონალების მომზადებისა და ჩართულობის ხელშეწყობით ადგილობრივი თვითმმართველობის განვითარების მხარდაჭერა.

ამ მიზნის მისაღწევად პროექტით გათვალისწინებულია:

• სტუდენტების მიერ მუნიციპალიტეტების საჭიროებების შესწავლა/ანალიზი, მუნიციპალიტეტების განვითარების გეგმის და ადგილობრივი ბიუჯეტის ალტერნატიული პროექტების შემუშავება.
• სტუდენტთა პროფესიული განვითარების ხელშეწყობა, თვითმმართველობის არსის და ადგილობრივი საბიუჯეტო პროცესის გაცნობა.

გუნდი დაკომპლექტებული უნდა იყოს 4-6 მონაწილისაგან. პროექტით  წახალისებულია სტუდენტთა მულტიდისციპლინარული გუნდების ფორმირება (მუნიციპალიტეტის საჭიროებების ანალიზისა და განვითარების ხედვის შემუშავებისათვის საჭირო კომპეტენციების შესაბამისად). გუნდს, რომელიც დაკომპლექტებული იქნება სხვადასხვა ფაკულტეტის (ეკონომიკა, სამართალი, ჟურნალისტიკა და სხვ.) სტუდენტებისგან უფრო გაუადვილდება კონკურსის რთული და მრავალმხრივი დავალებების შესრულება.

კონკურსი ტარდება სამ ეტაპად:

პირველი -  შესარჩევი ეტაპი, რომლის მიზანია საკონკურსო გუნდების ფორმირება და შერჩევა;

ყველა გუნდი, რომელიც წარმატებით გადალახავს შესარჩევ ეტაპს, მონაწილეობას მიიღებს მეორე და მესამე ტურში  და იმუშავებს კონკრეტული მუნიციპალიტეტის საჭიროებების შესწავლა/ანალიზსა და ამავე მუნიციპალიტეტის განვითარების ხედვის (გეგმის) შემუშავებაზე, საბიუჯეტო დაგეგმვაზე.

მეორე და მესამე ტურის მონაწილეებისათვის უშუალოდ მათ რეგიონებში ჩატარდება სპეციალური ტრენინგები თვითმმართველობის არსის, ასევე, კვლევის მეთოდების შესახებ,  რომლებიც დაეხმარება გუნდებს ამ ეტაპებზე გათვალისწინებული დოკუმენტების მომზადებაში.

მეორე ტურისათვის რეალური მუნიციპალიტეტების შერჩევისას შეძლებისდაგვარად იქნება გათვალისწინებული გუნდის სურვილი.

მეორე ეტაპი კონკრეტულ მუნიციპალიტეტში არსებული პრობლემების კვლევასა და ანალიტიკური  დოკუმენტის მომზადებაზეა ფოკუსირებული.  გუნდებმა კონკრეტულ  მუნიციპალიტეტში  არსებული ვითარების შესწავლისა და  ანალიზის საფუძველზე უნდა მოამზადონ ანალიტიკური დოკუმენტი „მუნიციპალიტეტის პრობლემები და საჭიროებები";

მეორე ეტაპი შედგება ორი ნაწილისგან: პირველ ნაწილზე განსაზღვრულია სტუდენტთა გუნდების მიერ საპროექტო წინადადების მომზადება და წარდგენა (საპროექტო წინადადებაში აღწერილი იქნება ანალიტიკური დოკუმენტის მომზადებისათვის საჭირო აქტივობები, კვლევის/შეფასების მეთოდოლოგია, ბიუჯეტი და სხვ.); პირველი ნაწილის შემდეგ გუნდები იღებენ უკუკავშირს (კომისიის მოსაზრებას, შენიშვნას, რეკომენდაციას). მეორე ნაწილი კი კონკრეტულ მუნიციპალიტეტში არსებული პრობლემების კვლევასა და ანალიტიკური დოკუმენტის მომზადებაზე, არსებული ბიუჯეტის ანალიზზეა ფოკუსირებული.

მესამე ეტაპი გულისხმობს  კონცეპტუალური დოკუმენტის მომზადებას „მუნიციპალიტეტის განვითარების ხედვა". დოკუმენტში ასახული უნდა იყოს გამოვლენილი პრობლემების დაძლევის გზები,  მუნიციპალიტეტის განვითარების გეგმა და მომდევნო წლის ბიუჯეტი.

პროექტი ითვალისწინებს სამუშაოს შესრულებისათვის საჭირო ყველა სახის ინფორმაციის მოპოვებას, ამისთვის გათვალისწინებულია ვიზიტ(ებ)ი მუნიციპალიტეტში, შეხვედრები, რაც დაეხმარება გუნდს აღნიშნული დოკუმენტის მომზადებაში (გუნდის მივლინება მუნიციპალიტეტში გათვალისწინებულია პროექტის ფარგლებში). 

კონკურსში მონაწილეობის მსურველები რეგისტრაციას გაივლიან  7 ოქტომბრიდან 7 ნოემბრამდე ელექტრონულად, სარეგისტრაციო პროგრამის მეშვეობით, ვებგვერდებზე online.naec.ge  www.naec.ge.

რეგისტრაციისას აუცილებელია შემდეგი ინფორმაციის მითითება:

1. ინფორმაცია გუნდის წევრების შესახებ:  უმაღლესი სასწავლებელი, ფაკულტეტი, მიმართულება, სწავლების საფეხური (BA, MA);  პროექტის განხორციელებაში გუნდის თითოეული წევრის შესაძლო წვლილისა და კომპეტენციის აღწერა .
2. ინფორმაცია გუნდის ლიდერის შესახებ;  უმაღლესი სასწავლებელი, ფაკულტეტი, მიმართულება, სწავლების საფეხური (BA, MA); ტელეფონის ნომერი და ელექტრონული  ფოსტის მისამართი. გუნდის ლიდერი არის ძირითადი საკონტაქტო პირი პროექტის განხორციელების ყველა ეტაპზე. 
3. მოკლე სამოტივაციო წერილი - 100 სიტყვა.
4. კონსულტანტი (ეს ველი არ არის სავალდებულო, გუნდი კონსულტანტს დაიხმარს სურვილის შემთხვევაში):  სახელი, გვარი, სამუშაო ადგილი, ტელეფონის ნომერი და ელექტრონული ფოსტის მისამართი. 

გუნდმა უნდა შეასრულოს სიმულაციური სავარჯიშო.  დოკუმენტი PDF  ფორმატში  უნდა აიტვირთოს  სარეგისტრაციო ფორმის შესაბამის ველში. 

სიმულაციური სავარჯიშოს მიზანი, გარდა შერჩევისა, მომდევნო ეტაპებისათვის ამ ტიპის დავალებებზე მუშაობისათვის  მონაწილეთა მომზადებაცაა. 

სიმულაციური სავარჯიშო შეიცავს   აღწერითი ხასიათის ინფორმაციას პირობითი მუნიციპალიტეტის შესახებ. ვებგვერდზე განთავსებული იქნება ყველა საჭირო  ინფორმაცია  პირობითი მუნიციპალიტეტის შესახებ. ასევე მითითებული იქნება სხვა სასარგებლო მასალების ბმულებიც.

კონკურსში მონაწილეობის მსურველმა გუნდმა მოცემულ ინფორმაციაზე დაყრდნობით

უნდა გააანალიზოს მუნიციპალიტეტში არსებული ვითარება. მას მოეთხოვება:

- მუნიციპალიტეტში არსებული პრობლემების იდენტიფიკაცია;
- პრობლემების პრიორიტეტიზაცია და დასაბუთება;
- პრიორიტეტული პრობლემების გადაწყვეტის სავარაუდო გზების აღწერა და დასაბუთება;
- ბიუჯეტის დაგეგმვა (ზოგადი მონახაზი).

სიმულაციური სავარჯიშო უნდა შესრულდეს რეგისტრაციის ვადის ამოწურვამდე. ცხადია, შესაძლებელია გუნდმა გაიაროს რეგისტრაცია, მომდევნო დღეების განმავლობაში კი შეასრულოს სამუშაო. რეგისტრაციის დასრულებამდე გუნდს შეუძლია ცვლილებების შეტანა დოკუმენტში და განახლებული ფაილის ატვირთვა. რეგისტრაციის ვადის ამოწურვის შემდეგ გუნდი შესრულებულ დავალებაში ცვლილებას ვეღარ შეიტანს - ვერ შეცვლის ატვირთულ ფაილს ახლით.

გუნდს შეუძლია ჰყავდეს  კონსულტანტი - კონკრეტული დარგის სპეციალისტი, ექსპერტი, პედაგოგი, ლექტორი, რომელიც კონსულტაციებით დაეხმარება გუნდს შესაბამისი სამუშაოს შესრულებისას.

დეტალური ინფორმაცია მაქსიმალური ქულისა თუ შეფასების კრიტერიუმების შესახებ გამოქვეყნდება დავალებასთან ერთად. 

ისევე როგორც შესარჩევი ეტაპის დავალებას, გუნდი ელექტრონულად ატვირთავს მეორე და მესამე  ეტაპის ფარგლებში მომზადებულ დოკუმენტებსაც.

თითოეულ ეტაპზე გუნდის მიერ წარმოდგენილ დოკუმენტს შეაფასებს შესაბამისი მიმართულების ექსპერტებისაგან დაკომპლექტებული კომისია წინასწარ შემუშავებული, შეთანხმებული კრიტერიუმებით, შეფასების სქემით. ნაშრომები გასწორდება კონფიდენციალურობის სრული დაცვით. 

გამარჯვებულებს გამოავლენს კომისია მეორე და მესამე ტურის შედეგებით (წინასწარ განისაზღვრება და გამოქვეყნდება შეფასების კრიტერიუმები). საუკეთესო შედეგის მქონე  გუნდები გამართავენ დისკუსიას მუნიციპალიტეტის განვითარების ხედვის, სტრატეგიული გეგმის შესახებ შესაბამისი მუნიციპალიტეტის ადგილობრივ  თვითმმართველობასთან. დისკუსიას დაესწრებიან ექსპერტები. 

მონაწილეთა შედეგები გამოქვეყნდება ვებგვერდებზე www.mokalake.ge online.naec.ge;  www.naec.ge 

მეორე და მესამე ტურში მონაწილეობას მიიღებს არაუმეტეს 70 გუნდისა (შეირჩევიან გუნდები, რომელთა ნაშრომს საუკეთესოდ ჩათვლის კომისია).

დეტალური  ინფორმაციისათვის დაგვიკავშირდით ცხელ ხაზზე 2473333 ან მოგვწერეთ პროექტის Facebook-ის  გვერდზე www.facebook.com/StudentsForGeorgia 

კონკურსის სპეციფიკიდან გამომდინარე, გუნდური მუშაობა კონკურსის აუცილებელი პირობაა, შესაბამისად, მონაწილე, რომელიც არ არის რომელიმე გუნდის წევრი, დამოუკიდებლად ვერ მიიღებს მონაწილეობას კონკურსში. 

კონკურსში მონაწილეობის მიღება შეუძლიათ სტუდენტურ გუნდებს (ბაკალავრიატის ან სამაგისტრო პროგრამების სტუდენტებს). 

ამ მხრივ არანაირი შეზღუდვა არ არის - გუნდი შეიძლება დაკომპლექტდეს სხვადასხვა უმაღლესი სასწავლებლების სტუდენტებისგან. 

გუნდში შეიძლება იყოს როგორც ბაკალავრიატის სტუდენტი, ისე მაგისტრანტი.